32 m2 – Unha traxicomedia confinada – ButacaZero
Presentación
32m2 é unha peza de teatro do absurdo: do absurdo no que comezamos a vivir no mes de marzo de 2020 que cambiou as nosas vidas xa para sempre. Un absurdo no que as Curvas, o Medo e a Morte ocupan cada vez máis espazo entre as paredes das nosas vidas. “32m2 é un enredo co que todo o público se poderá sentir identificado, pois todos mercamos un chisco máis de papel hixiénico do habitual , todas aplaudimos puntuais ás 20h, e finalmente acabamos por descubrir a merda que tiñamos debaixo das propias alfombras”.
Sinopse
Xan e Mar viven tranquilamente a súa vida antisistema no seu pequeno piso de 32m2. Mar traballa todo o día fóra da casa e Xan limpa, cociña, frega, vai ao supermercado, e, de tanto en tanto, le o seu xornal favorito: un do 2003. Pero un día, o mundo esmendréllase. Xan fica atrancado na claraboia e no supermercado non hai papel hixiénico. A xente di que é todo culpa dun Virus. Pero quen se fía da xente? É todo tan raro que non lles queda máis remedio que poñer a tele, agochada quen sabe onde dende quen sabe cando. Nada máis prendela, o Presidente dá unha nova inclasificable: está prohibido ir a traballar. Mar non dá creto: por fin un Presidente que entende á clase traballadora! Xan non dá creto: dende cando á súa muller lle gusta o que di o Presidente? E sobre todo: por que agora lle gusta o Presidente?
Ficha técnica/artística
- Texto: Esther F. Carrodeguas
- Dirección: Xavier Castiñeira e Esther F. Carrodeguas
- En escena: Nuria Gullón e Xurxo Cortázar
- Música orixinal: Rodrigo Cuevas
- Escenografía e iluminación: Beatriz de Vega
- Vestiario: Alicia Root
- Coreografía: Beba Gayoso
- Axudante de dirección: Anxo Outumuro
- Construción: José Faro “Coti”
- Comunicación: The Office Comunicación
Unha produción de ButacaZero co apoio da: Axencia Galega de Industrias Culturais da Xunta de Galicia (Agadic)
Coa colaboración especial de: Gadis e Reizentolo
