Que é Mundo Escénico?

Mundo Escénico é unha plataforma dixital que nace co obxectivo de modernizar, democratizar e facer máis accesible o mundo das Artes Escénicas en Galicia. A comunidade de Mundo Escénico conecta a espectadores, artistas, profesionais e organizadores buscando que:

  • Os espectadores conten cunha completa axenda cultural actualizada constantemente pola propia comunidade.
  • Os membros de grupos e compañías teñan un lugar onde divulgar os seus espectáculos e recibir un feedback directo.
  • Os programadores culturais dispoñan dun completo directorio de grupos e espectáculos para deseñar a súa axenda.
  • Os profesionais podan ofrecer os seus servizos á comunidade.

Mundo Escénico forma parte do terceiro programa de emprendemento Go2Work, un espazo de coworking que promoven a Deputación de Pontevedra e a EOI. Detrás hai un equipo de expertos en creación de startups que colaboran con Mundo Escénico para impulsar esta plataforma social que pretende fomentar a cultura escénica en Galicia.

O promotor

Daniel Amós Rodríguez

Daniel Amós é natural de Moaña (Pontevedra) e a súa paixón polas Artes Escénicas, e en particular polo teatro, levouno a converterse nun dos membros fundadores da asociación moañesa Teatro Avresno, agrupación onde actuou e tamén dirixiu varias obras. Tamén formou parte de Teatro Xerigonza na Universidade de Vigo, compaxinando a actividade en ambas agrupacións teatrais durante varios anos. Aparte do teatro, tamén se empapou durante varios anos do folclore tradicional como parte dunha asociación folclórica-cultural en baile galego, algo que lle fixo ver o grande valor e riqueza que ten esta disciplina e tamén a necesidade de impulsar a súa divulgación para dala a coñecer aproveitando as novas tecnoloxías. No tocante á súa formación académica, Daniel estudiou Enxeñería de Telecomunicacións pola Universidade de Vigo, chegando a doutorarse no 2015, mentres traballaba como investigador no Centro Tecnolóxico de Telecomunicacións de Galicia. Esta formación complementa a súa faceta artística cunha faceta máis tecnolóxica, o que lle permite xestionar de forma máis completa esta comunidade online galega das Artes Escénicas.

Perfil de LinkedIn