O nacemento de Corifeo Teatro (2011) está vinculado á Aula de Teatro da Universidade da Coruña, onde nos formamos. Na actualidade as persoas integrantes do grupo dedicámonos á educación en diferentes niveis e desde distintos perfís profesionais, de aí que un dos nosos intereses fundamentais sexa a relación entre o teatro e a educación.
Centramos o noso traballo no teatro en lingua galega, tanto en obras de autores e autoras galegas (“Animaliños”, de Roberto Vidal Bolaño, “Boas noites”, de Paula Carballeira…) como en traducións de obras clásicas (“A cantante calva”, de Eugène Ionesco; “Contos por teléfono”, de Gianni Rodari…).
Animaliños de Roberto Vidal Bolaño
SINOPSE:
Unha parella vén de mercar un adosado con xardín e, nunha destas, descobre que o xardín está sendo asolado por unha praga de caracois.
DURACIÓN:
50 minutos aprox.
XÉNERO:
Comedia
IDADE RECOMENDADA:
3º e 4º da ESO e Bacharelato
Adultos
ROBERTO VIDAL BOLAÑO:
Figura clave do teatro galego (autor, actor e director), homenaxeado no Día das Letras Galegas 2013.
Como escritor, a súa é unha das producións máis importantes do teatro galego contemporáneo.
A obra Animaliños, estreada con Teatro do Aquí no ano 2002, forma parte dunha triloxía, xunto con Anxeliños e Criaturas, onde desde a ironía e o humor analiza determinados aspectos do presente.
Por ela recibiu nos Premios María Casares 2003 os seguintes recoñecementos: mellor espectáculo, mellor dirección, mellor texto orixinal e mellor iluminación. (https://robertovidalbolano.org/)
A NOSA PROPOSTA:
En Corifeo Teatro fixemos unha selección de escenas da obra de Roberto Vidal Bolaño, con entidade propia, na que principalmente nos centramos nos diferentes puntos de vista que xorden na urbanización de adosados cando se produce a praga de caracois. Asistiremos ao adestramento dun grupo de propietarios que se organizan a modo de exército para intentar acabar con esta praga de maneira desesperada. As chamadas ao adestramento prodúcense ao son dunha alarma que interrompe a obra
unha e outra vez.
UNIDADE DIDÁCTICA:
No caso de que a nosa proposta fose seleccionada, enviaríamoslles aos centros escolares participantes unha unidade didáctica para traballar na aula.
Próximas actuacións
Publicar unha valoración
Debes iniciar sesión para enviar valoracións.